Uns Naver Benno Garbsen weer op Kur. Siet Johren klagt Benno över Pien in den Rüüg oder de Been oder de Arms. He hett as Timmermann jümmer hard un körperlich swoor arbeid un siet siene Fru Bärbel storven is, ok de heele Arbeid in Huus un Goorn an de Hacken. „Dorvun ward de Pien oder de Rüüg ok nich beeter!“, seggt de Dokter. „Se mütt mol in de Hänn vun Fachlüüd, mol richtig afschalten, sick verhaalen – se mütt op Kur!“
Kurschatten oder nich …
De Kollegen in de Firma spoort nich mit goode Ratschlääg. He schall sick man forts eenen Kurschatten toleggen. Dat is good för de Geselligkeit un lenkt af vun Pien un slechte Stimmung. Man Benno winkt af: „Wat schall ick mit so een Person? Miene Bärbel kann doch nüms ersetten.“ Toerst maakt Benno ok mol grote Oogen över dat, wat de Dokter em allens verschrifft. Elk een Morgen vör dat Fröhstück schall Benno to Watergymnastik. Dat is good för de Gelenke. He schall Waterpedden un siene Arms in koolet Water stippen, dat is good för de Dörchblutung. Nahmeddags schall he mit’n Stock wannern. „Nee!“, protesteert Benno. „Sowied is dat noch nich!“ Man de Dokter verkloort em, dat he mit Hölp vun twee Stöck oprechter gahn kann un düchtig in Sweet kaamen schall – vun wegen de Kilos, de em bi dat Bücken un Böögen in’n Weg sünd. Achteran kann he sick von den Masseur dörchkneten laaten un sick verhaalen.
Spezial-Therapeutin
Glieks an den ersten Dag in den Kurort fallt Benno de lütte Vosskopp op. De Fru spaddelt so drollig bi de Watergymnastik, wiel se so lütt is, dat se man knapp in dat Becken stahn kann. Dorbi mutt se sülben anduernd lachen un oppassen, dat se keen Water sluckt. Dütt sööte Lachen hett Benno direktemang in’t Hart draapen. Annern Dag süht he to, dat he so in dat Becken to stahn kümmt, dat he de Fru mit de roden Hoor in’t Gesicht kieken kann. De beiden plinkert sick to bi dat een oder anner Manöver. As Benno an den drütten Dag an dat Danz-Café vörbislendert, süht he de lütte Fru dor an een Disch sitten. He faat sick een Hart, geiht rin un fragt slankweg: „Wüllt se miene Danz-Therapeutin sien?“ Dor mutt de Fru lachen – un dat süht he doch so geern. De beiden danzt den heelen Nahmeddag tosaamen un verafredt sick glieks ok för annern Dag.
Se heet Flora Berger un is Wittfru. Benno hett sick lang nich so good föhlt as mit düsse quickfidele Fru, de so levenslustig is. Dorüm hett he sick wat överleggt. He verafredt sick mit Flora in den Kurpark un nödigt eer, in een vun de Strandkörv to sitten. Dor seggt he: „Ick heff miene Brill vergeeten. Kannst du mi mol eben vörlesen, wat dor ünnen op mienen Therapieplan steiht?“ He hett dor sülben hinschreeven: Dreimal täglich küssen! „Ach“, grientjert Flora, „denn bün ick woll ok diene Kuss-Therapeutin. Na denn man los, wi sünd al veer Daag in Trüchstand!“aad all de Navers in“, seggt Guschi. „Dat Prachtstück vun Osterbrunnen – ganz ahn Brunnen – mutt bestaunt warrn. Ick spendeer Rundstück un Bockwuss, denn ick glööv Röhrei harrn wi in düsse Straat för dütt Johr genog.“
Fru Jürs:
De Leev to de plattdütsche Spraak hett Birgitt Jürs vun eern Grotvadder mitkreegen. Siet över 25 Johren schrifft de Niemünsteranerin „Riemels, Leeder un Vertellen“, weer 15 Johr as free Mitarbeiderin bi den „Holsteinischen Courier“ un gifft eer Wark geern bi Lesungen to’n Besten. Siet 2007 bringt se de leevswerten Eegenschaften vun de Norddütschen in eer monatliche Kolumne in de „Lebensart“ to Papeer – jümmer ut den heiter-ironischen Blickwinkel un mit fienet Geföhl för Land, Lüüd un Wöör.
Foto: Adobe Stock
