Picknick-Geföhl

© Pixel-Shot/ Adobe Stock

Wat gifft dat Schöneret in de Sommertied, as een Picknick in‘t Grööne. Ut dütt Geföhl hett een ganze Reeg vun Firmen een Geschäft maakt. Mit bunte Prospekte in Hochglanzoptik maakt se uns klor, dat wi för een Picknick een gediegen Utrüstung brukt. Dat fangt an mit een Rucksack, de een Extra-Afdeel hett för een grotet Holtbrett, twee Beeker, twee Emailletüller un Besteck mit Holtgriff. So een Utstattung is wat för Wanderslüüd oder Fohrradfohrer. Dat wiest se uns ok op de erste Siet vun den Prospekt.

Wat för Familien

De neegste Utführung is wat för Familien. Een Kuffer ut Korbgeflecht mit Gurt-Halterung för veer Plastiktüller, veer Koffiebeeker un een Dasch för dat Besteck. Sogor Solt- un Peeperstreuer hört noch to de Utrüstung un Platz för een Deckel-Schöddel för den Kantüffelsalat is ok noch. Is blots Schiet, dat een den Kuffer oprecht dragen mutt un de Kantüffelsalat denn to Hälfte an den Deckel backt. Vun dütt Modell gifft dat natürlich ok een Luxus-Utführung. Dor süht de Kuffer fiener ut un statt Plastik-Geschirr is dor Porzellan, echte Glöös un Stahlbesteck binn. Op dat Fohrrad kriggt een den Kuffer jüst noch verstaut – mit Gummigurt to‘n Fastmaaken.

Wat för dat Auto

De neegst höögere Opmaakung op dat Rebeet Picknick-Utrüstung kann een blots noch as Auto-Tourist mit op Tour nehmen. Dor hört blangen dat Eet- un Drinkgeschirr ok een Klappdisch un veer Hocker dorto. Natürlich kann een dat Modell ok mit Kugelgrill un Miniköhlschapp hebben. Wenn een dormit afsiets vun Straaten un Parkplätz eenen Picknickplatz in‘t Grööne hebben will, brukt man een Sack-Karr, üm de Utrüstung mittosleepen. Kann ja liekers schön sien.

Dat gifft aber ok noch een heel anner Möglichkeit. Ick maak för mienen Mann un mi twee Stück Käsbrot, wickel dat in Pergamentpapeer un verstau dat tosaamen mit twee Appels un een Waterbuddel in mienen lütten Rucksack. De kümmt op dat Fohrrad un denn suust wi af in de Feldmark. Dor söökt wi uns eenen Platz an den Knick, wo de Sünn hinschient un packt uns ole Deek ut. De Vagels un de Hummeln maakt uns de Dischmusik, wi sett uns daal, geneet de Roh un den Duft vun all dat Grööntüg üm uns rüm un find uns Käsbrot-Picknick genau richtig.

Birgitt Jürs

De Leev to de plattdütsche Spraak hett Birgitt Jürs vun eern Grotvadder mitkreegen. Siet över 25 Johren schrifft de Niemünsteranerin „Riemels, Leeder un Vertellen“, weer 15 Johr as free Mitarbeiderin bi den „Holsteinischen Courier“ un gifft eer Wark geern bi Lesungen to‘n Besten. Siet 2007 bringt se de leevswerten Eegenschaften vun de Norddütschen in eer monatliche Kolumne in de „Lebensart“ to Papeer, – jümmer ut den heiter-ironischen Blickwinkel un mit fi enet Geföhl för Land, Lüüd un Wöör.

Vorheriger ArtikelEin bunter Strauß an Kunst und Kultur
Nächster ArtikelErlebnis Mittsommernacht