Is se dat ok all mol opfullen? Man knapp, dat wi de Wiehnachsdekoratschon an de Kant hebbt, den letzten Schoko -Wiehnachsmann in den Kookendeeg bröckelt un dat letzte Marzepanbrod verdrückt, denn künnt wi mit de Osterdekoratschon ok all wedder anfangen.
Veer Weeken vör dat Osterfest geiht dat meist all los. Denn haalt wi de Kartons mit all de sööten Hasen ut Holt oder Plüsch un all de wuscheligen Osterküken wedder vun‘n Böön, üm dormit unsere Wahnung to schmücken.
In de Vörgoorns süht een denn wedder Bööm, de mit bunte Ostereier behangt sünd un op de Finsterbanken liggen de Marienkäfer, de uns Kinner dormols in den Kinnergoorn bastelt hebbt. Tante Lisbeth freut sick, – as all de ölleren Minschen, dat de Daag wedder länger hell sünd un de Kinner freut sick op Osterferien un Ostereiersööken. Miene Navers Guschi Sievers un sien Fru freut sick op de Reis na Hildesheim, wo se eern Söhn besöökt un Chrischan Möller un sien Fru Trude plant elk een Johr een Utfl ug in een annere Gegend vun Sleswig-Holsteen.

Allens frisch maaken

Blots mien Fründin Gesa schient sick överhaupt nich op de Osterfierdaag to freuen. „Ick weet ok nich, woans dat kümmt,“ sinneert se, „man Fred kriggt jümmer in‘t Fröhjohr so eenen Rappel, dat he wat renoveeren mutt. Urlaub will he för de Opfrischung vun uns Huus aber ok nich opfern. Also blievt blots de Osterdaag, üm de Ärmel hochtokrempeln.“
Gesa hett recht. Ick besinn mi dor op, dat se vergangen Johr de Wahnstuuv tapzeert hebbt un dat Johr dorvör, de Slaapstuuv. „Dütt Johr brukt wi eenen niegen Köökenherd,“ bericht Gesa, „dor meent Fred, dat wi denn man ok glieks de Wand achter den Herd moderniseeren schullen. – Weet ji, wat dat heet? – De heelen Köökenschränke utpacken, Kacheln vun de Wand kloppen, de Wand spachteln un mit düsse niemodsche Spezialfarv anmalen.
De mutt 24 Stünnen dröögen bevör dat Spezialglas dorvör anbröcht warrn kann. Achteran den niegen Herd ansluuten, allens reinmaaken un de Köökenschapps wedder inrüümen.
In de Twüschentied kaakt wi op een Campingkooker in‘n Keller un sünd achteran sülven renoveerungs-bedürftig.“ Naverschapshölp
All kiekt se so‘n beeten benaut vör sick hin, bit Arthur Gesa op de Schuller tippt un seggt:
„Dat weer ja gelacht, wenn wi uns Navers verkaamen laat. Weest‘ wat, an‘ Ostersünndag kaamt ji beiden bi uns to‘n Osterfröhstück, dat ji ju een beeten verhaalen künnt. Wokeen hett Ostermaandag noch Platz an den Disch un wokeen övernümmt de annern beiden Daag? – So as wi all de Vörfreud hebbt, kriggt ji beiden de Freud nah Ostern, wenn allens wedder trech is – un bit dorhin foodert wi uns Navers dörch!“

Birgitt Jürs
De Leev to de plattdütsche Spraak hett Birgitt Jürs vun eern Grotvadder mitkreegen. Siet över 25 Johren schrifft de Niemünsteranerin „Riemels, Leeder un Vertellen“, weer 15 Johr as free Mitarbeiderin bi den „Holsteinischen Courier“ un gifft eer Wark geern bi Lesungen to’n Besten. Siet 2007 bringt se de leevswerten Eegenschaften vun de Norddütschen in eer monatliche Kolumne in de „Lebensart“ to Papeer, jümmer ut den heiter-ironischen Blickwinkel un mit fienet Geföhl för Land, Lüüd un Wöör.

Vorheriger ArtikelFRÜHLINGSGEFÜHLE IN DER HAFENCITY
Nächster ArtikelDigital geführte Tour nach Behlendorf