Sensibel oder Taktgeföh

Fru Jürs

As Verköper för Kledasch mutt een dat richtige Fingerspitzengeföhl hebben. Dat gellt nich blots för de passende Utwahl för de Kundschaft, sünnern ok för den eleganten Ümgang mit de Persönlichkeit. All dat Afschätzen vun de Konfektschonsgrötte is een Eierdanz. Manch Kundschaft hört dat gor nich geern, wenn de Verköper allto luud över de passende „Grötte 56 ünnersetzt“ nahdenkt. Wenn so een Överbekleedungs-Spezialist klook is, seggt he to den Kunnen: „Mit 54 kaamt se woll ut“ un langt em liekers de 56ger Kledasch in de Ümkleedekabin.  So’n Verköper kümmt de Kundschaft ja ok teemlich nah, – dat heet, rein körperlich is he oder se dicht bi den Kunnen, wenn de sick in so een Kabine ümtreckt. Gau noch mol de Jack glattsstrieken oder dat Etikett na binnen bugsieren is ja dat Minnste. Mennigmol mutt aber ok de Büxenlänge afsteekt  oder de richtige Positschon vun de Antogbüx bekeeken warrn. Annerletzt hör ick dor een Verköper fragen: „Sünd se een Hochstapler oder Deepstapler?“ De Mann stickt den Kopp dörch den Vörhang vun de Kabin un fragt: „Wat?“ „Na“, seggt de junge Mann blangenan, „he will weeten, wat se eer Büx över oder ünner den Buuk dräägt!“

Op de Siet vun de Damen weer een Verköpersch togangen, de harr woll eern lustigen Dag tofaaten. Een Fru, de sick een Kostümjack utsöcht, de achtern in de Mitt eenen Schlitz hett, röppt se achteran: „De künnt se nich dräägen! Dormit seht se ut as een Aant op’n Diek. Bi eer korte Taille sparrt de Schlitz jümmer op!“ Fix hett se een anner Jack to Hand, de beeter passt. Jüst as so’n lütte Madam mit een Arm vull Kleeder an eer vörbistüert, grient de Verköpersch un schüddköppt: „Ach, Fru Lagebarg, se wüllt doch nich wedder Grötte 38 anprobeeren? De passt nu all siet veer Johren nich mehr. Dor mütt se sick doch langsam an gewöhnt hebben. Geevt se mol her, ick haal se de 42er Kleeder. Dormit hebbt wi beiden weniger Stress!“ Bi een junge Deern, de sick in een huutenget Abendkleed quetscht hett, stellt se den groten Speegel so, dat sick de Deern vun achtern bekieken kann un kommenteert: „Wullt du würklich so op den Saal?“ As sick een öllere Daam inmischt mit: „Se möögt dat aber seggen!“ Kriggt se glieks to Antwort: „Wat nützt dat, wenn ick de Lüüd mit dat falsche Stück na Huus gahn laat. Denn geevt se veel Geld ut för Saaken, de se achteran nich antrecken möögt. Denn bün ick lever ehrlich un direkt!“

Tja, so geiht dat to twüschen de Ümkleedekabinen, – un wi maakt uns Sorgen över Datenschutz….