Bit güstern kunn ick mi weglachen, wenn bi een Person as Beruf „Influencer“ steiht. Dat heet översett ja nix wieder, as dat de Person, de in‘t Internet jichtenswat in de Gegend posaunt, Influss op all de Lüüd nümmt, de sick dat ankiekt. „Schön dumm!“ heff ick dacht, sick vun anner Lüüd, de een gor nich kennt, wat vörsnacken to laaten. Wo sülvstverleevt mutt man sien, dat man sick sülben filmt un inspannt in de Werbung för allerhand Kledasch.
KÖÖKENMASCHIN ODER KOOKENREZEPTE
Fröher hett man düsse Personen PropagandaFruuns nöömt. Se stunnen, pünktlich to‘n Wuchenend-Inkoop, mitsamt de Produkte vun een bestimmte Firma, in den breeden Gang vun den Supermarkt. Mien Fründ Fiete Klook hett sick een üm anner Mol an de Proven, de se verdeelt hebbt, satt eeten. Dor geev dat lütte Happen vun Deepköhlkost, Stücke vun Appelkooken ut de Folie oder Kääswürfel, Fruchtjoghurt un Pulverkoffie. Wenn denn ok noch een Stand mit Rodwien dorbi weer, harr uns Fründ so‘n recht tofreeden Grientjer in‘t Gesicht.
PROPAGANDA-FRUUNS
Een vun düsse Propaganda-Fruuns weer so een lütte, patente Daam, de mit eer Schört jümmer so pük utseh. Wenn se een kortet Kleed anharr, denn weer dat Kleed jüst so lang as breed. Man eer strahlendet Lächeln hett holpen, de meisten Produkte good an den Mann oder de Fru to bringen. Ick stunn jüst mit een Sluck vun den Pulverkoffie bi eer an den Stand, as so een recht gehässige Fro eer toröppt: „Wenn ick achteran so utseh as se, denn drink ick dat Tüchs leever nich!“ Dor hett de lütte Madam sick nich lang besunnen un röppt trüch: „Weeten se, ick heff mi as Werbeblock beworben. Se kunnen ja höchstens bi de Bohnenstangen mitmaaken!“
OP UN DAAL IN‘T NET
Man hüüt find een düsse Art vun Werbung överhaupt nich mehr. Dat löppt allens op un daal över dat Internet. Wokeen sick dor döchklickt, kann licht swinnelig warrn vör all den unsinnigen Quatschkram, wat een dor to hören un sehen kriggt. Man ick heff dor een gewaltige Lück entdeckt twüschen all dat Gedöns vun Heckenscheer bit Gesundheitskissen. Mi schient so, as wenn dor noch nüms op kaamen is, wat de Minschen würklich brukt. Dat gifft bestimmt echten Bedarf an mien Kunzept. Dat is good för de Nerven, is bannig naahaltig, ökologisch inwandfree un kostengünstig. Ick warr neegste Week een Opteeknung mit mien Handy maaken, wo ick in de Sofa-Eck sitt un Socken strick. Dütt Bild vun innere Roh deiht jedereen good. Blots so dorsitten un stricken is sowat vun beruhigend. Dor ward man ganz vun sülvst dörch un dörch ruhig un gelassen. As tweetet Angebot kunn ick ok na tein Minuten jümmer langsamer stricken. Dat kann ick so‘n halve Stunnstied woll dörchhoolen. De Lüüd, de mi op eer Handy tokiekt, ward denn mööd un künnt beeter inslaapen. Dat sport de Slaap-Pillen un is ok veel gesunder. – Ick bün nu all gespannt, wo veel Klicks ick dormit kriegen kann. Mit woveel Follower mutt ick denn as New-Influencerin so reeken? Wenn dat good löppt, kann ick ok vör de Kamera Hohlsaumstickeree anbeeden oder Slaapleeder singen…… mol sehen, wat geiht?
