All Lüüd wüllt to Pingsten schönet Wedder hebben. De Een wüllt rut in de Natur to‘n Wandern, de annern wüllt op eer Fohrrad un een örnliche Tour mit Picknick maaken. Tomindst dröög mutt dat sien, anners kriggt een doch noch eenen natten Mors bi de Buten-Aktivitäten. De Lüüd vun den Campingplads hebbt vun Ostern bit nu rödelt mit all den Kram, den man för de Bequemlichkeit op de Parzelle brukt. Dat Vörtelt steiht akrat, de Windschutz is opbuht, de Strom- un Wateransluß funkschoneert, – nu kann dat schöne Leven an de frische Luft losgahn. Dor präpareert man sick för de Pingstdaag mit Holtkohle, Grillfleesch un passende Getränke un verafredt sick mit de Platznavers, üm dat Camping-Fröhjohrsgeföhl to fiern.
Bibbern oder ersten Sünnenbrand?
As ick een lütte Deern weer, harrn wi to Pingsten ganz annere Sorgen. Wenn dat nödig weer, kreeg ick een Pingstkleed. Dat weer dat fällige Sommerkleed, wiel ick ut dat Vörgänger-Modell rutwussen weer. Dorto gehörten op jeden Fall witte Kneestrümp, egal, wat wi buten blots tein Grad harrn oder nich. Un wiel Pingsten ja een Fierdag weer, wöör nich arbeid. Denn kreeg Opa de Liegestöhl vun‘n Böön un wi wesselten uns af mit den Platz an de Sünn. Achteran harrn wi oftmols genau so veel Sünnenbrand as de Camper, de to lang bi dat „Anbaden“ tokeeken harrn.
Seilers hebbt een annern Kalenner
Ganz een annern Kram is dat mit Pingsten un Seilers. De hebbt sick ok all siet Ostern präpareert mit Boot klormaaken un de ersten Törns mit koole Finger. Wokeen op de Ostsee togangen is, de nutzt de Fierdaag villicht för een Besök in de Dänsche Südsee un mutt tosehen, dat he oder se to rechte Tied in de Havens kümmt, üm noch een goden Platz an Steg un Poller to kriegen. De Nordsee-Seilers hebbt üm düsse Tied blots een Ziel. Helgoland! Elk een Johr ward de Pingst-Regatta un de Nordsee-Week vun den Segelvereen ut Övelgönne an de Elv utricht. Wokeen denn Lust hett, bi düsse Wettfohrt dorbi to sien, de stellt sick een Regatta-Crew tosaamen un seilt över de dütsche Bucht na Helgoland. Dor ward de Haven denn so vull mit Yachten, dat een vun Boot to Boot quer över den Haven to Foot wannern kann. För veele Seilers is dat erst de richtige Saison Optakt. De reekend denn vun een Regatta to de neegste. De warme Johrstied mutt utnutzt warrn! Mi dücht mennigmol, dat de Seilers een annern Kalenner hebbt. De tellt blots de Daag, wo se op See sünd. Am besten hebbt dat bi all düsse Aktivitäten de Tokiekers. De künnt an de Kant stahn un Klookschietern. In düssen Sinn: Frohe Pingsten!
Birgitt Jürs
De Leev to de plattdütsche Spraak hett Birgitt Jürs vun eern Grotvadder mitkreegen. Siet över 25 Johren schrifft de Niemünsteranerin „Riemels, Leeder un Vertellen“, weer 15 Johr as free Mitarbeiderin bi den „Holsteinischen Courier“ un gifft eer Wark geern bi Lesungen to’n Besten. Siet 2007 bringt se de leevswerten Eegenschaften vun de Norddütschen in eer monatliche Kolumne in de „Lebensart“ to Papeer, – jümmer ut den heiter-ironischen Blickwinkel un mit fienet Geföhl för Land, Lüüd un Wöör.
