üstern keem ick dor över to, as Ute Holtappel un mien Fründin Gesa an’t Klönsnacken weeren. Ute stunn in eeren Vörgoorn un Gesa op den Footweg, dortwüschen de Heck. „Ach, nee, ick mag dat Düster un de Küll vun den Februar nich!“, seggt Gesa, „dor warr ick meist melangklöterich.“ Dat kenn ick all vun miene Fründin. Se hett denn so eene Tied, wo se mit sick un de Welt överkrütz is. Man Ute lacht un smustert in sick rin: „Dorgegen heff ick een Rezept!
Ick nööm dat: mien Egoisten-Maand.“ Gesa un ick kiekt uns verdattert an. Ute is gewiss keen Egoistin, de blots an sick sülben denkt. Dat Gegendeel is de Fall, se is jümmer to Stell, wenn jichtens een Naver Hölp brukt oder wenn dat för de Gemeenschap wat to doon gifft.
Wellness-Tied
„Kannst‘ uns dat Rezept mol verraden?“, frag ick. „Elkeen Week, wenn Franz bi den Sport is, günn ick mi een Badewann vull Soltwater mit Solt ut dat Dode Meer. Dat hölpt, üm all de Slacken un Schadstoffe ut den Körper to kriegen. Achteran mutt man 20 Minuten utrohen. Dorüm versorg ick miene Hoor vörher noch mit een Hoor-Kur, smeer mi een dicke Cremmaske op dat Gesicht, wickel mi een Handdook üm den Kopp un legg mi lang. Achteran de Hoor-Kur wedder utspöölen un de opsmeerte Maske afwaschen. Wenn ick denn de Hoor mit Föhn un Hoorböss wedder in Form bring, mark ick, dat se week un elastisch sünd un ok wedder Glanz hebbt. Miene Huut in’t Gesicht hett sick ok wedder glatt maakt. Dat föhlt sick allens good an.“
Gesa treckt eere Stirn in Folden: „Dat is een Dag in de Week. Wat maakst du mit den groten Rest vun den Maand?“ Ute denkt kort na: „Annern Dag maakt ick eenen Spazeergang in de Meddagspaus oder kaak Gemüsepann mit Stangensellerie oder maak för de heele Familie Obstsalat oder stell mi op de Terrass un sing de Amseln wat vör oder sett mi een ganze Stünn an’t Finster un lees dat Book, dat ick all lang mol lesen wull oder laat mi een Massage geven oder maak een Termin bi de Footplegersch. Ick maak ut de heele Tied een Wellness-Tied un richt dat so in, dat ick elk een Dag mi sülvst wat Goodes do!“ Gesa un ick nicköppt uns to. Wi hebbt verstahn. Dat mütt wi unbedingt ok mol utprobeeren.
Fit för dat Fröhjohr
Dat Solt-Bad heff ick schafft. Man achteran bün ick mitsamt de Hoor-Kur un de Cremmaske inslaapen. Man good, dat mien Mann mi weckt hett. Wokeen weet, wat ick den Kram anners överhaupt wedder rünner kreegen harr. Liekers hebbt Ute un Gesa un ick uns den heelen Februar över gegensiedig opstachelt, uns elk een Dag wat uttodenken, wat uns good deiht. Also ehrlich: Na so een Egoisten-Maand föhlt een sick fit för dat Fröhjohr. Man kann dat meist gor nich aftööven, dat de Goornarbeit wedder losgeiht. Hett dor een seggt, dat de Februar jümmer so düster un schietig is? Hebbt wi gor nich markt.
Birgitt Jürs
De Leev to de plattdütsche Spraak hett Birgitt Jürs vun eern Grotvadder mitkreegen. Siet över 25 Johren schrifft de Niemünsteranerin „Riemels, Leeder un Vertellen“, weer 15 Johr as free Mitarbeiderin bi den „Holsteinischen Courier“ un gifft eer Wark geern bi Lesungen to’n Besten. Siet 2007 bringt se de leevswerten Eegen- schaften vun de Norddütschen in eer monatliche Kolumne in de „Lebensart“ to Papeer, – jümmer ut den heiter-ironischen Blickwinkel un mit fienet Geföhl för Land, Lüüd un Wöör.z
