Vörgüstern seeten wi mit uns Frünn Gesa un Fred tosaamen. Gesa wedelt mit een ganze Handvull vun Reiseprospekten. „Wüllt wi gau noch mol een poor Daag Urlaub maaken?“, fangt se an und breed de Angebote mit de bunten Biller op den Disch ut. „Dat Duppelzimmer Komfort kost in’n November meist blots de Hälfte!“ Beide Mannslüüd böögt sick bi düsse Ankünnigung över den Disch. So’n lütt beeten afdükern ut den Alldag klingt doch good. Wi veer Frünn schuuvt nu de Prospekte hin un her, üm dat beste Hotel för den günstigsten Pries ruttofinnen.
Översicht mit den Kalenner
Man denn haalt Fred den Kalenner. An’n achten November is de grote Aukschon vun den Kinnerschutzbund in de Holstenhall. Dor wüllt wi op jeden Fall hin. An’n dörteinsten hett Fred Versammlung vun den Modellfleger–Vereen. He is de Kassenwart un dörf nich fehlen. An’n ningteinsten is Buß- un Bettag. Dat bedüüd grotet Goosbradeneeten in den Landkrog mit all de Navers – un dat hebbt wi sülben organiseert. Mit den Sportvereen find de Wiehnachsfier dütt Johr al an’n eenuntwintigsten November statt – anners weer keen Lokal free west –, un de letzte Freedag in den Novembermaand is reserveert för de Wiehnachsfier vun de Firma. So’n beeten hölplos kiekt wi uns gegensiedig an. Kann dat wohr sien, dat wi nich mol eene Week hebbt, wo nix in den Terminkalenner steiht?
Villicht künnt de Navers
Wi beslut, neegstet Johr eene Freeweek in’n November intoplanen. Dütt Johr langt wi de Prospekten mit den günstigen Novemberurlaub eenfach wieder an uns Navers. Mathilde lacht: „Dat hebbt wi eenmol maakt, man denn kaam ick mit dat heele Adventsgetüdel nich achteran un Guschi kriggt den Bastelkram för de Enkel nich to rechte Tied fardig.“ Gertrud un Chrischan Möller schüddköppt, wiel se dütt Johr de grote Nordmannsdann rünnernehmen wüllt un denn hett Trude so veel Grööntüg, um Kränze un Girlannen to bind, dat se för Urlaub gor keen Tied hett. Bi Arthur sünd so veele Wiehnachsfiern, wo he opdükern mutt, dat he an Urlaub gor nich denken kann. Baabento wöör he denn ja dat Gedenkkunzert to’n Dodensünndag verpassen. So geiht ok dütt Johr de November dorhin mit Terminstau un den langen Anloop op dat Wiehnachsfest. Bi lütten frag ick mi, wat drifft uns eegentlich an, dat wi blots nix verpassen wüllt? Villicht wöör sick dat Verpassen good anföhlen bi so een ganz entspannten November-Urlaub?
Fru Jürs:
De Leev to de plattdütsche Spraak hett Birgitt Jürs vun eern Grotvadder mitkreegen. Siet över 25 Johren schrifft de Niemünsteranerin „Riemels, Leeder un Vertellen“, weer 15 Johr as free Mitarbeiderin bi den „Holsteinischen Courier“ un gifft eer Wark geern bi Lesungen to’n Besten. Siet 2007 bringt se de leevswerten Eegenschaften vun de Norddütschen in eer monatliche Kolumne in de „Lebensart“ to Papeer – jümmer ut den heiter-ironischen Blickwinkel un mit fienet Geföhl för Land, Lüüd un Wöör.
Foto: Adobe Stock
