Vör een poor Daag heff ick Greten Peemöller in den Supermarkt draapen. Se süht ut, as wenn eer een daaldükert hett. „Knapp dat de Fierdaag vörbi sünd, verkrupt sick de Lüüd un een bemött nich mol mehr de Navers“, schimpt se. „Bi dütt Schietwedder is dat ok keen Wunner!“, anter ick. Dor verklort Greten mi, dat se sick örnlich veel Snee wünscht, so as vör een poor Johren, wo wi uns elk een Dag op de Straat draapen hebbt bi de Sneeschuberee. Dor hett man jedenfalls noch een poor Wöör tosaamen snackt.
Gesa swöögt vun vergangene Tieden
Dütt Johr hebbt Guschi Sievers un Chrischan Möller sogor de Klönbank wegdraagen, de sünst jümmer twüschen de beiden Opfohrten an de Heck twüschen de Garagen steiht. „Is ok würklich to kold un natt buten“, segg ick noch un denn dreiht wi beiden af to’n Inkööpen.
Annern Morgen kümmt mien Fründin Gesa un bringt mi den Strohkranz trüch, den se för eeren Adventskranz utlehnt hett. Ick vertell eer vun Gretens Sorgen. „Dat is ok wohr!“, seggt Gesa op’n Stutz. „Wat hebbt wi fröher för eenen Spass hatt mit den veelen Snee. Wi hebbt de Kinner all den Snee op eenen Hümpel packt, dat se eeren eegen Rodelbarg harrn, hebbt uns op de Straat draapen un Klönsnack hoolen un een vun uns hett jümmer bi de ole Fru Lemke den Weg na de Huusdöör free schüfelt, dat se heel na Huus kümmt.“ „Eenmol hebbt wi uns in de Schummertied sogor bi Holtappels in’t Carport draapen, wiel Franz Appelpunsch trechmaakt harr un Ute hett Waffeln backt för de heele Naverschap“, fallt mi noch in, „dat hebbt wi achteran jümmer uns Sneeschuber-Party nöömt.“
Goode Idee
„Goode Idee!“, seggt Mathilde, as wi eer dorvun vertellt. Se keem jüst dorto, as ick Gesa an de Döör bröcht heff. „Kaamt mol mit un kiekt in Guschis Warksteed. Dor hett he mit Chrischan de Klönbank hindraagen. Dag för Dag sitt de beiden nu dor un besnackt, wat in de Welt passeert. Wi ward mol Bescheed seggen, dat se de Warksteed oprüümen mütt. Hüüt Abend kaamt de Navers to een Sneeschuber-Party, de wegen nattkoolet Wedder na binnen verleggt is. Mi kümmt dat good to Pass. Ick heff noch een ganze Schachtel vull Wiehnachsplätten un ji künnt ja wat anners mitbringen“, kommandeert Mathilde. Klock fief, in de Schummertied, kaamt tatsächlich all de Navers mit Plätten oder Stollen, Punsch oder Tee in Thermoskannen. Jedereen hett sien Beeker mitbröcht. För Fru Lemke ward de grote Korfstohl trechrückt. De beiden Rentner sünd heel begeistert vun de Idee, mol een Sneeschuber-Party ahn dat lästige Schüfeln to fiern.nklamotten rut kaam, anners dörf ick bi Mathilde nich an den Meddagsdisch.“
Fru Jürs:
De Leev to de plattdütsche Spraak hett Birgitt Jürs vun eern Grotvadder mitkreegen. Siet över 25 Johren schrifft de Niemünsteranerin „Riemels, Leeder un Vertellen“, weer 15 Johr as free Mitarbeiderin bi den „Holsteinischen Courier“ un gifft eer Wark geern bi Lesungen to’n Besten. Siet 2007 bringt se de leevswerten Eegenschaften vun de Norddütschen in eer monatliche Kolumne in de „Lebensart“ to Papeer – jümmer ut den heiter-ironischen Blickwinkel un mit fienet Geföhl för Land, Lüüd un Wöör.
Foto: Adobe Stock
