Dat schall ja Lüüd geeven, bi de fallt dat Angrillen un dat Afgrillen direktemang op den sülbigen Dag un ebenso is dat mit dat An- un Afbaden. Düsse Experten ünnerbreekt eer Bade-Saison blots bi Iesgang op de Ostsee. Dat is bi mi aber anners! Bi 6-8 Grad Watertempratur stieg ick nich in de Flooten. – Ick sett mi ja ok nich in mien Köhlschapp. Erst wenn de Sünn de See op 16-18 Grad opwarmt hett, fangt för mi de Freud an’t Baden an, – an‘ leevsten mit „Opwarm-Garantie“, dat heet tomindst so veel Sünnschien, dat ick nah dat Afdröögen glieks wedder warm bün.
För dat stünnenlange Rümliggen bün ick nich de Typ. Ick maak leever een Spazeergang mit de Fööt in’t Water oder sett mi op een Steen un bekiek mi dat bunte Strandleven. Jümmer sünd dor lütte Kinner, de een Sandhupen to een Burg opschüfelt un blanke Traanen vergeet, wenn een grote Well de Anlag överspöölt un plattmaakt. Dat gifft ok jümmer grote Kinner, de bi dat Ballspeelen sodennig rümtovt, dat se anner Lüüd ümrennt un Döösbaddels, de över anner Lüüd röberspringt, de dor op eer Handdook liggt. Denn sprütt de Sand vun de Fööt so fein över de frisch mit Sünnmelk insmeerte Huut, dat dat Larm un grulige Blicke gifft.
Würklich spannend ward dat bi de ünnerscheedlichen Versööke, in dat Badetüch rin oder wedder rut to kaamen. Meist süht een ja de Variatschon: „Ick wickel mi dat Handdook üm!“ Hest du aber recht een kumplette Figur, rutscht dat Dook weg, bevör du diene Normalkledasch dor ünner rut fummelt hest. Baabento is so een Bade-Antog (oder Badebüx) ut elastischet Material, wo du all de nödigen Körperdeele rinwrangen mußt. Dorbi kümmt een sodennig in’n Sweet, dat man de Afköhlung in’t Meer good bruken kann. Achteran denn allens retur, – un dat geiht noch sworer, wiel de Huut vun’t Soltwater stumpf is. Wokeen dat schafft, ahn dat dat Handdook afstürzt, gellt bi mi as Artist.
Miteens stunn annerletzt een öllere Herr blangen mi un fragt: „Hebbt se sehn, wokeen dor in stickt?“ He wiest op een Ding, dat utsüht as een Litfaßsäule ut Segeldook. Dat schient een Ümkleede-Kabin op twee Been to sien. Dat boxt un zappelt in de Stoff-Tünn, ward grötter un lütter, böögt sick na beide Sieden bit baaben twee Arms rutkaamt un een junge Deern in Kleedergrötte 34 dor rut stiggt. Se driggt een winzigen Bikini un dat langt ok bi de Figur. „Ach wo schaad!“ seggt dor de Mann blangen mi, „Ick heff dacht, dor sünd tomindst twee Personen binn‘ un öövt eern Utdrucksdanz!“
