Diet Johr un Dag draapt wi uns in de Naverschap elk een Deenstag, so üm un bi Klock söß, bi Guschi Sievers un Chrischan Möller an de Rentnerbank. Dor tuscht wi Kooken-Rezepte, frisch kaakte Marmelad, övertelliget Gemüse ut den Goorn un natürlich all de wichtigen Informatschons över Gott un de Welt, de Kinner un de Politik.
So weet wi denn ok över all de Navers good Bescheed, künnt gau mol hölpen, wenn dat nödig deiht, oder uns över de Macken vun den een oder annern heemlich amüseeren. Wi nicköppt, wenn Arthur to’n fö ten Mol ankünnigt, dat he dat Smööken opgi t oder hört gedüllig to, wenn Gerda Bloom vun eer opregenden Köökenbelevnisse vertellt.

De Super-Huusfru

Gerda weer all jümmer een Super-Huusfru. Man siet de Kinner ut’n Huus sünd, hett se de Köök to een Hobby Warkssteed maakt. To’n ersten Advent geev dat Hirschrüüg mit Preiselbeersoß. To’n tweeten Advent keem schwedschen Schinkenbraden un Plumpudding op den Disch. Twüschendörch hett Gerda dree Rodkohlköpp verarbeid un in Glöös inweckt. To’n drütten Advent geev dat Lachs mit een ganz vigeliensche Sempsoß, denn noch Aantenbost mit Appelsinsoß un den groten Goosbraden to Wiehnachen. – Vun all düsse Herrlichkeiten sünd Reste överbleeven. „Dat freert wi in!“ seggt uns patente Huusfru, „Denn hebbt wi wat, wenn dat mol fi x gahn mutt!“

Januar-Patent

As Silvester vörbi weer, geev dat in Gerdas Deepköhlschapp keen eenzigen freen Placken mehr. Babento föhlt Gerda sick nich mehr so recht „free“ in all eer Röck un Büxen. All dat goode Eeten is op de Figur slaagen. Dat stellt ok Hans-Otto fast. Dor hett Gerda forts een Diät-Kockbook rutkreegen un sett blots noch Gemüse ahn Fett un Fleesch op den Disch. So veer bit fi ef Daag geiht dat ok good. Man denn hett eer Mann de Nees vull vun Magerkees un Grönkernpuffer.
Man uns Gerda weet Rat. Se kriggt een achter den annern de Reste ut den Deepköhler un maakt eern Mann düsse Mahltieden trech. Se sülben leggt een ganze Wuch ahn fastet Eeten in. Dat gi t blots wat to drinken. Tja, uns Gerda will nich blots een Super-Huusfru sien, nee, ok een goode Figur maaken. So hett se uns jedenfalls eer Januar-Patent verklort. För Hans-Otto weer dat een kulinarische Reis: „trüchwarts dörch de Adventstied“. He hett nich meckert!

Birgitt Jürs
De Leev to de plattdütsche Spraak hett Birgitt Jürs vun eern Grotvadder mitkreegen. Siet över 25 Johren schrifft de Niemünsteranerin „Riemels, Leeder un Vertellen“, weer 15 Johr as free Mitarbeiderin bi den „Holsteinischen Courier“ un gifft eer Wark geern bi Lesungen to’n Besten. Siet 2007 bringt se de leevswerten Eegenschaften vun de Norddütschen in eer monatliche Kolumne in de „Lebensart“ to Papeer, – jümmer ut den heiter-ironischen Blickwinkel un mit fi enet Geföhl för Land, Lüüd un Wöör.

Vorheriger ArtikelWertvolle Zeit für die Gesundheit
Nächster ArtikelXXL-Wünsche