Motivatschons-Kurs

Elk een Motivatschons-Kursus fangt mit de Fraag an: Is dat Glas halfvull oder halvleer? Dor ward denn lang un breed över snackt, wokeen positiv denkt un wokeen eher to de Pessimisten tohört. Dat is ok so in Fred sienen Kursus. Man de Trainer teekend dat halvulle un dat halfleere Glas an de Tafel un leggt in de Mitt vun den Ruum een Springtau op den Footbodden. Denn fordert he de Lüüd op, sick för de een oder anner Siet to entscheiden un sick dor optostellen.Natürlich stellt se sick all op de Optimistensiet hin. Se weet ja all, worüm dat geiht.

Na een halve Stünn Diskuschon över positive Grundinstellung sünd se seeker, dat se allens richtig maakt hebbt. Dor schrifft de Trainer de Wöör kritisch un unkritisch op de Tafel. Is doch klor, dat se all kritisch sünd, mutt een Chef doch sien. Man de Trainer wiest se dorup hin, dat se dor all op de Pessimistensiet staht. Oha, nu geiht dat Gesnöter los, wat wichtiger is. – Wedder na een halve Stünn mütt se sick entscheiden twüschen Twiefel un Tovertruen. Dor is de Opdeelung all fifty-fifty. De eenen behaupt: „Du kannst dien Mitarbeider doch nich allens glöven. Wat meenst du, wat de di ünnerjubelt!“ De annern meent: „Ahn Totruen, musst du allens sülben kontrolleeren. Denn kannst’ man glieks inpacken!“

De neegsten Wöör heet Strenge un Nahsicht

Dor gifft dat een poor Deelnehmer, de wannert twüschen de beiden Lager hin un her. Dat is ok richtig, na den Trainer sien Meen, wiel een gooden Chef beides brukt. He mutt de Lüüd tohören un vun Fall to Fall entscheiden. So geiht dat den heelen Dag wieder. All halve Stünn opstahn, rümloopen un een Siet utsööken. Se argumenteert un snackt sick de Köpp hitt. An’t Enn vun den ersten Kursus-Dag fragt de Trainer, wat se hüüt leernt hebbt.

As se em all ankiekt as een Fraagteeken, gifft he sülben de Antwort. „Se hebbt rutkreegen, dat man op so bekloppte Stöhl nich länger as een halve Stünn sitten kann, dat Bewegung good is för den Kreisloop, den Grips, den Rüüg un de Been, dat gegensiedig Tohören hölpt, üm sülben schlauer to warrn un dat bi een Mischung ut spannende Fragen, Bewegung un Diskuschon nüms mööd ward. Dat sünd de wichtigsten Motivatschonsgrundlagen!“

Hinterlasse jetzt einen Kommentar

Kommentar verfassen